PR-G 91 Ruta Piscinas do Río Pedras - A Portela

Lugar: Pobra do Caramiñal
Distancia: 18 km
Duración: 7 h
Dificultade: media-alta

Descrición:
Ruta de dificultade media-alta, dirixida a persoas en bo estado físico debido aos desniveis existentes. A baixada dende o lugar do Alto das Brañas ata as piscinas do río Pedras, contornando o río San Xoán, describe unha forte pendente con abundancia de penedos. Esta ruta dá a coñecer o entorno natural e cultural da Pobra do Caramiñal, contando con sorprendentes vistas á Ría de Arousa.
a. Alto das Brañas – Piscinas do río Pedras: a ruta descende polo río San Xoán, ata chegar ao convento da Misarela, pasando por piscinas naturais, fermosas fervenzas e divisando panorámicas da Ría de Arousa. O roteiro presenta neste tramo un grao de dificultade alto, debido ao terreo irregular e á forte pendente. Na parte final do descenso atópanse as ruínas do convento da Misarela punto onde conflúen os cursos fluviais dos ríos San Xoán e Barbanza para formar o río Pedras. O cauce deste río transcorre por terreo de rocha granítica e debido á erosión do mesmo, formáronse unhas piscinas naturais escavadas na propia rocha ao carón da arboreda típica de ribeira, conformando un escenario de gran beleza.
b. Piscinas do río Pedras- Aldea Vella:  este tramo cruza a ponte de pedra da Misarela, de orixe medieval. No mesmo sendeiro, a uns 50 metros da ponte, atópanse os petroglifos da Misarela
c. Contornando o río Pedras o sendeiro lévanos ata Aldea Vella, fin de traxecto no concello da Pobra do Caramiñal.

Convento da Misarela: Restos dun convento franciscano fundado arredor do ano 1.392. Pódense apreciar diversas estruturas edificatorias. O conxunto compleméntase cun sistema de canalizacións que conducen a auga dende a beira do río, unha calzada empedrada e unha ponte de pedra.
Petroglifos da Misarela: Conxunto de gravados formado por dúas pedras. A primeira presenta un gravado cun tipo de M e un punto; e na outra pedra hai tres cruces, dúas con base triangular e unha con base circular.
Aldea Vella: Segundo escritos, a Aldea Vella data do século IX e estaba formada por un conxunt o de muíños que actualmente se atopan en ruínas.