Ruta do río grande

Comezo: Campo da festa de Ardilleiro.
Punto de remate: Casa de Cultura de Camporrapado.
Distancia: 23,300km.
Duración: a pé 6h. en bicicleta 4h.
Dificultade: Media.
Época do ano: Primavera-verán
Material: Botas de baixa montaña.

Itinerario
Partimos do Campo da festa de Ardilleiro. Cruzando a pista fronte á igrexa, a uns 200 m., atopamos o muíño de Pazos. Seguindo a pista en dirección a Reboredo, a 500 m. atopamos un camiño á esquerda que nos leva ao muíño de Añobó. Voltamos á pista e a 450 m, antes do cruzamento de Reboredo, collemos un camiño á esquerda e logo de andar uns 300 m. chegamos ao muíño de Batán. Río abaixo atopamos, aproximadamente cada 50 m., os muíños de Batán, dos Carrillos, dos Contos, dos Mareques e Novo.
Saímos despois para uns prados á dereita para tomar a pista que vai a Codeso. Este tramo é de difícil acceso, pero é un marco dunha beleza incomparable. Deixando Orto á dereita a 1 km. tomamos primeiro un cruzamento á esquerda, e logo a 100m. á dereita, para logo de percorrer 450m. tomar outro cruzamento á dereita que nos levará ao muíño Torrental.

Voltamos á estrada e tomamos un cruzamento á dereita. Logo de 300 m. atopamos unha fonte de pedra e a 300 m pasando unha ponte chegamos por debaixo dunha viña ó muíño da Braña.
Volvemos á estrada e saímos á dereita para a 400 m. tomar outra vez á dereita para desviarnos de novo na mesma dirección. A 200 m. atopamos a capela de San Paio, e no río, ó seu pé, vemos o muíño do Balado e o muíño de Eugas, poucos metros máis abaixo. Tamén hai unha fermosa fervenza.

Volvendo á estrada que vai ao Empalme de Vilar (Touro), tomámola nesa dirección, e vemos a igrexa de Codeso, e podemos ver un cruceiro e un hórreo. A uns 3 km. tomamos un cruzamento á dereita e a 100 m outra vez á dereita. A outros 100 m. vemos o muíño de Vilapedre e 250 m. máis abaixo o muíño da Devesa. A 150 m. desviámonos á dereita e imos de fronte deixando a aldea de Loureiro á esquerda. A 100 m. do cruzamento camiñamos campo a través ata o río, e logo uns metros máis arriba está o muíño de Loureiros.

Voltando á pista, camiñamos 100 m. ata chegar a unha ponte. A 200 m. tomamos un cruzamento á esquerda, e logo a 500 m. á dereita, quedando a 150 m. de nós a casa-muíño de Boo. A 100 m. imos á esquerda, para a 300 m. chegar á ponte que nos marca a entrada na parroquia de Pousada. En 200 m. río abaixo atópanse os muíños do Torreiro, Leáns, Meulle e do cura, todos eles de difícil acceso. A 600 m. da ponte tomamos o cruzamento á dereita, e a 700 m. outra vez á dereita para dirixirnos a Donas, onde vemos un bonito cruceiro e gozamos coa impresionante vista da ponte do Gundián sobre o río Ulla e do castro na cima do monte. Onda o cruceiro comeza unha viña que discorre bordeando unha finca durante uns 500 m. ata chegar ó muíño de Donas e á casa-muíño de Engracia. Cruzando Donas deixamos a igrexa á dereita e saímos con dirección a Sucira, ao chegar ao cruzamento dirixímonos ó centro da aldea, á esquerda, deixando á dereita da igrexa a área de lecer que está situada na beira do Ulla. A 400 m. imos á dereita e a 100 m. baixamos o regato atopando os muíños de García e de Sucira, ademais dun sigular lavadoiro de pedra.

De volta á pista tomamos a costa abaixo e a 300 m. desviámonos á esquerda. A 750 m., antes de chegar a Noente tomamos un camiño á dereita, a 100m. de novo á dereita e logo andamos uns 200 m. río abaixo ata chegar ao muíño de Cereixo.

De volta á pista saímos á dereita e logo de pasar a área de lecer de Noente tomamos a 100 m. o desvío á esquerda cara a Camporrapado. A 1500 m. seguimos un cruzamento de fronte e imos dar ao campo da festa de Camporrapado, onde podemos ver un fermoso cruceiro. Saíndo á esquerda, con dirección a Santiago, a 500 m. collemos un cruzamento á esquerda, e a 300 m. á dereita, onde chegamos ao campo de futbol. A 200 m. queda a casa da Cultura, onde remata a ruta.